រឿង៖ តាចាស់ប៉ះចោរថ្មី

អំពើ​ប្លន់​មិន​បាន​សម្រេច​មួយ​បាន​កើតឡើង ។ មហាសំណើច​សួម​ជួន​ខ្លឹមសារ​ទាំងមូល​ដូច​តទៅ ៖

ចោរ ៖ ” ហ្អេ​! ម៉ូតូ​ឌុប តោះ​ទៅត្រង់​ហើយ​បត់​ឆ្វេង ” ។ ជិតដល់​កន្លែង​ស្ងាត់​តា​ម៉ូតូ​ឌុប​សួរ ៖ ” បត់​ទៅ​ណា​ទៀត ? ” ។ ចោរ​ដក​កាំភ្លើង​ភ្ជង់​ចង្កេះ​តា ៖ ” ឈប់​ម៉ូតូ​ភ្លាម អា​កញ្ចាស់​! ” តា​មិន​ឈប់​បែរ​ជា​មួល​ហ្គែ​ថែម រំពេច​នោះ​ម៉ូតូ​ក៏​លឿន​ដូច​ព្យុះ ។ ចោរ​ស្រែក​គំរាម ៖ ” ឈប់ភ្លាម​អា​កញ្ចាស់​! ប្រយ័ត្ន​អញ​បាញ់​! ” ។ តា​គំរាម​វិញ ៖ ” បាញ់​ទៅ​ដួល​ងាប់​ទាំងអស់​គ្នា អញ​មិន​ស្ដាយ​ទេ​! អញ​អាយុ ៦៩ ឆ្នាំ​ហើយ​! ” ។ តា​មិន​ព្រម​បន្ថយ​ល្បឿន ចោរ​ភ័យ ៖ ” ឈប់​ទៅ​តា​! ខ្ញុំ​ឈប់​ប្លន់​ហើយ​.​.​. ” ។ តា​តប ៖ ” អញ​មិន​ជឿ​ឯង​ទេ បើ​អញ​ឈប់ ឯង​ច្បាស់​ជា​បាញ់​អញ​ហើយ​! ” ។ ចោរ​បោះ​កាំភ្លើង​ចោល​ហើយ​យំ ៖ ” ដាក់​ខ្ញុំ​ចុះ​ទៅ​តា​.​.​. ខ្ញុំ​បោះ​កាំភ្លើង​ចោល​ហើយ​តា​! ” ។ ” អស់​កាំភ្លើង​ក៏​ឯង​អាច​វាយ​អញ​ស្លាប់​ដែរ​! ” តា​មិន​ព្រម​ឈប់​ហើយ​បើក​ម៉ូតូ​ដូច​ព្យុះ​រហូត​ដល់​កន្លែង​ប៉ូលីស ។