៨០- ភ្លើងក្រោធដុតចិត្ត ក្ដៅហើយបាបទៀត

ការខឹងក្រោធធើ្វឱ្យចិត្តសៅហ្មង ក្ដៅក្រហាយក្រវល់ក្រវាយទោះ
ដេកឬអង្គុយក៏មិនជាសុខដែរ។ នេះគឺជាភ្លើងក្នុង អាស្រ័យនឹង
ចិត្តណាកើតឡើងរមែងដុតនូវចិត្តនោះ ដូចភ្លើងអាស្រ័យនឹង
អុសណាឆេះឡើង ក៏រមែងដុតកម្ទេចនូវអុសនោះ ដូច្នោះឯង។

ភ្លើងគឺសេចក្ដីក្រោធនេះ បើមិនចេះពន្លត់វាទេវានឹងឆេះឱ្យក្ដៅ
ជានិច្ចរឿយៗតទៅ បើពន្លត់បានក៏ត្រជាក់សប្បាយដេកនៅ
ជាសុខ ។

អ្នកណាស្អប់ខ្ពើមយើងក៏ស្រេចតែគេទៅ ព្រោះការស្អប់ខ្ពើម
បានទម្លាយនូវសេចក្ដីសុខភាពផ្លូវកាយ ជាពិសេសផ្លូវចិត្ត
របស់គេស្រេចទៅហើយ យើងមិនត្រូវស្អប់ត្រឡប់តបវិញ
ឡើយ ។ ការស្អប់ត្រឡប់តប គឺជាការទៅបន្តភ្លើងពីគេយក
មកដុតខ្លួនឯងផង ។

១នាទី មានប្រយោជន៏

ស្រង់ចេញពី៖ សៀវភៅ មេរៀនជីវិត