គតិលោក ឬច្បាប់ទូន្មានខ្លួន ភាគ៦
រៀបរៀង ដោយ ឧកញ៉ាសុត្ដន្ដប្រីជា ឥន្ទ
ចម្លងតាមការផ្សាយរបស់ពុទ្ធសាសនបិណ្ឌត្យ
រៀបរៀង ដោយ ឧកញ៉ាសុត្ដន្ដប្រីជា ឥន្ទ
ចម្លងតាមការផ្សាយរបស់ពុទ្ធសាសនបិណ្ឌត្យ
មានឆ្មាស្រុក១ ចាបពូក១ នាយគេចិញ្ចឹមនៅជាមួយគ្នា
ថ្ងៃមួយមានចាបព្រៃ១ ហើរមកទំនៅជិតនៃចាបពួកនោះ ហើយពោលពាក្យតិះដៀល ចាបនៅក្នុងទ្រុងជាភាសាកុណជាតិ
អែចាបនៅក្នុងទ្រុងក៏កើតទោសសាឡើង តាំងជេរប្រទេចទៅចាបព្រៃវិញ ចាបទាំងពីរកើតជំលោះជេរគ្នាទៅវិញទៅមក
តែនឹងប្រចឹកគ្នាពុំបាន ព្រោះ១នៅក្នុងទ្រុង ១នៅក្រៅទ្រុង អែឆ្មាស្រុកបានលឺចាបទាំងពីរឈ្លោះគ្នាដូច្នោះ
ក៏ខឹងនឹងចាបព្រៃថា អាសត្វចង្រៃ ហេតុអ្វីវាមកឈ្លោះប្រកែកនឹងចាបជាសំលាញ់អញអេះ
បើដូច្នេះអញនឹងជួយចាបជាសំលាញ់ចុះ គិតហើយឆ្មានោះ លបទៅចាប់ចាបព្រៃនោះបាន
ហើយទំពារស៊ីសាច់ចាបព្រៃកើតក្ដីឆ្ងាញ់ពិសា ទើបដឹងថា អញមិនដឹងជាសាច់ចាបព្រៃមានរសជាតិឆ្ងាញ់ដល់ម្លេះសោះបើដូច្នេះ
ចាប់ដើមតាំងពីថ្ងៃនេះទៅ អញនឹងស្វែងចាប់ចាបព្រៃអាស្រ័យជាចំណីខ្លួន
ឆ្មានោះគិតដូច្នោះហើយ ពីថ្ងៃនោះមកតាំងស្វែងលបចាប់ចាបព្រៃ អាស្រ័យជានិរន្ដរ៍
ថ្ងៃមួយឆ្មានោះរកចាប់ចាបព្រៃពុំបាន កើតញ៉ាមមាត់អត់ពុំបាន ទើបហែកទ្រុងចូលទៅចាប់ចាបជាសំលាញ់បរិភោគតាមក្ដីប្រាថ្នាខ្លួនហោង។
រឿងនេះ បានគតិដល់បុគ្គលជានាហ្មឺនធំ រឺចៅហ្វាស្រុក
ដែលពុំធ្លាប់លក់រាស្រ្ដប្រជាម្ដងសោះ នោះអធ្យាស្រ័យក៏ល្មមសមគួរ តែបើបានលក់រាស្រ្ដបានប្រាក់មាសម្ដងហើយ
កើតញ៉ាមអត់ពុំបានដល់ក្រោយមិនយល់មុខនរណា ចេះតែលក់ទាំងអស់ ទោះសាច់ញាតិសន្ដានខ្លួនក្ដី
ក៏ចេះតែលក់មិនរើសមុខថានរណាឡើយ កើតដោយញ៉ាមបានដូចយ៉ាងឆ្មាស្រុកស៊ីចាបសំលាញ់ខ្លួននោះអែង។
ចប់តំរាញ៉ាមមាត់ទី៣០
ប្រភព៖ មណ្ឌលវប្បធម៌ខ្មែរនៅស្វីស
No comments:
Post a Comment