គតិលោក ឬច្បាប់ទូន្មានខ្លួន ភាគ២
រៀបរៀង ដោយ ឧកញ៉ាសុត្ដន្ដប្រីជា ឥន្ទ
ចម្លងតាមការផ្សាយរបស់ពុទ្ធសាសនបិណ្ឌត្យ
ព.ស ២៥៣៩
រៀបរៀង ដោយ ឧកញ៉ាសុត្ដន្ដប្រីជា ឥន្ទ
ចម្លងតាមការផ្សាយរបស់ពុទ្ធសាសនបិណ្ឌត្យ
ព.ស ២៥៣៩
មានកូនក្មេង ១នាក់អាយុ
១៥ឆ្នាំជាក្មេងកំព្រាឥតមាតាបិតារក្សា
ក្មេងនោះទៅនៅដោយសាររោងនាយពិសេស
គឺរោងគ្រួសំរាប់ធ្វើក្រយាស្ងោយអ្នកស្ដេច
ឯនាយពិសេសគេក៏អាណិតមេត្ដាអោយនៅ ហើយគេប្រើអោយលាងចានលាងថាស
ជូតសមស្លាបព្រា
អោយប្រាក់ខែក្នុងមួយខែជាប្រាក់៥-៦កាក់ល្មមការសាហុយបាន ក្មេងនោះឧស្សាហ៍ធ្វើការក្នុងមុខក្រសួងរបស់ខ្លួន
បានប្រាក់តែរាល់ខែរៀងមក។
ឯព្រះបរមខត្ដិយាព្រះចៅផែនដី
ស្ដេចតែងយាងមកទតការក្នុងរោងពិសេស
បានទ្រង់យល់ក្មេងនោះធ្វើការស៊ីឈ្នួលលាងចាននោះរឿយៗ។
ថ្ងៃមួយស្ដេចទ្រង់យាងមករោងពិសេស
យល់កូនក្មេងកំពុងតែលាងចាននៅក្រៅរោង ស្ដេចត្រាស់សួរថា «ចៅឯងស៊ីឈ្នួលលាងចាន សព្វថ្ងៃនេះមានប្រាក់ប៉ុន្មានហើយ»។ ក្មេងនោះឆ្លើយថា «សព្វថ្ងៃនេះខ្ញុំមានស្មើនឹងស្ដេចផែនដី»។ ស្ដេចត្រាស់ថា «ការដែលរកស៊ីឈ្នួលគេក្នុងលោកនេះ
គឺការស៊ីឈ្នួលលាងចាន ជាការទាបថោកបំផុតម្ដេចចៅឯងស្ដីអួតថា
ខ្លួនមានសម្បត្ដិស្មើនឹងយើងជាម្ចាស់ផែនដីផ្ទៃក្រោមនេះ»។
ក្មេងនោះក៏អធិប្បាយថា «ខ្ញុំស៊ីឈ្នួលគេសព្វថ្ងៃនេះ ក្នុង១ខែគេអោយ៥-៦កាក់ក៏ពិតមែន
តែការដែលទទួលទានបាយក៏ត្រឹម១ឆ្អែត ទទួលទានដំណេកក៏ត្រឹម១ពេល
ឯអ្នកស្ដេចដែលមានសម្បត្ដិច្រើនរាប់មិនអស់នោះសោត
ក្នុង១ថ្ងៃក៏គង់សោយព្រះក្រយាស្ងោយត្រឹមតែ១ឆ្អែតដូចគ្នា
នឹងសោយអោយលើសអំពីនោះទៅក៏ទេ ការដែលទ្រង់ផ្ទំសោតក៏ទ្រង់ផ្ទំត្រឹម១ពេលដូចគ្នា
នឹងអោយលើសលែងពីនោះទៅក៏ទេហេតុនេះទើបខ្ញុំថា
ខ្លួនខ្ញុំមានសម្បត្ដិស្មើនឹងស្ដេចផែនដីដែរ»។
ឯមហាក្សត្រាធិបតីបានស្ដាប់ពាក្យក្មេងវាអធិប្បាយប្រាប់
ហេតុយក១ឆ្អែតជាប្រមាណដូច្នោះហើយក៏ទ្រង់យល់ថាពិត
ថាមែនប្រាកដណាស់ទ្រង់ពិចារណាមើលហេតុទៅ ក៏ពុំមានខុសអំពីគ្នា
គឺអ្នកក្រក៏ស៊ីត្រឹម១ឆ្អែត អ្នកមានក៏ស៊ីត្រឹម១ឆ្អែតដូចគ្នា
ស្ដេចមានព្រះហរិទ័យស្រលាញ់ពាក្យក្មេងនោះក្រៃពេកទើបទ្រង់ប្រទានមាសប្រាក់សំពត់ខោអាវអោយទៅក្មេងនោះ
ហើយទ្រង់ចារឹកពាក្យក្មេងនោះ ហៅថាពាក្យអ្នកប្រាជ្ញបានក្នុងលោកនេះ។
មានរឿងមួយទៀត ឈ្មោះថាតំរាស្របតបតគ្នា។
ប្រភព៖ មណ្ឌលវប្បធម៌ខ្មែរនៅស្វីស
No comments:
Post a Comment