គតិលោក ឬច្បាប់ទូន្មានខ្លួន ភាគ៥
រៀបរៀង ដោយ ឧកញ៉ាសុត្ដន្ដប្រីជា ឥន្ទ
ចម្លងតាមការផ្សាយរបស់ពុទ្ធសាសនបិណ្ឌត្យ
រៀបរៀង ដោយ ឧកញ៉ាសុត្ដន្ដប្រីជា ឥន្ទ
ចម្លងតាមការផ្សាយរបស់ពុទ្ធសាសនបិណ្ឌត្យ
មានបុរសពីរនាក់ ម្នាក់មានប្រពន្ធជាស្ដ្រីកាឡកិណី
ម្នាក់ទៀតមានប្រពន្ធជាស្ដ្រីប្រកបដោយលក្ខណា។ ជនទាំងពីរត្រកូលនោះយកគ្នាជាមិត្ដសំលាញ់
តែងទៅមករកគ្នាជានិច្ច។ ថ្ងៃមួយចៅបុរសប្រពន្ធមានល័ក្ខណ៍ ទៅបានគងមង្គលអំពីសំណាក់ទេវតា
អោយយកមកវាយយកមាសប្រាក់កែវកង សំពត់អាវគ្រឿងឧបភោគបរិភោគសព្វប្រការ អែចៅមាណពប្រពន្ធខាតល័ក្ខណ៍បានដឹងថា
សំលាញ់អាត្មាកើតមានទ្រព្យសម្បត្ដិ ដោយអំណាចគងមង្គល ហើយទើបទៅកាន់ផ្ទះសំលាញ់
ហើយសុំខ្ចីគងមង្គលនោះទៅវាយ ដើម្បីអោយកើតមាសប្រាក់កែវកងដូចគេ អែចៅបុរសក៏ព្រមអោយខ្ចី
ហើយហាមថា សំលាញ់អែងយកគងយើងទៅវាយនោះ គឺវាយបានតែក្នុងខណៈ៣ដង តែបើលើសអំពី៣ដងទៅពុំបានទេ
មួយទៀតចូរសំលាញ់អែង រៀបទៀន ធូប ភ្ញីផ្កា គ្រឿងពិធីអោយល្អប្រយ័ត្នមាត់ក
កុំអោយពោលហួសប្រមាណ ចូរអធិដ្ឋានសដៅសុំយកវត្ថុមួយៗទើបសំរេច។
ឯចៅមាណពនោះ ក៏ទទួលពាក្យសំលាញ់គ្រប់ប្រការ ហើយកាន់យកគងនោះលាទៅផ្ទះអាត្មា
មានសេចក្ដីត្រេកអរ នឹងបានទ្រព្យសម្បត្ដិក្រៃពេកណាស់ លុះទៅដល់ ក៏និយាយប្រាប់ប្រពន្ធសព្វសេចក្ដីហើយប្រើប្រពន្ធរៀបគ្រឿងពិធីបូជា
អែមេកាឡកិណីលឺប្ដីប្រើអោយរកទៀន ធូប លាជ ផ្កា ដូច្នោះ ក៏ពុំទទួលរកទាំងពុំមានចិត្ដជឿគងមង្គលនោះផង។
អែចៅប្ដីឃើញប្រពន្ធខ្លួនពុំអើពើផងដូច្នោះ ក៏ស៊ូស្ងៀមទៅ តាំងរកទៀនធូបដោយខ្លួនអែងបានហើយ
ក៏តាំងបូជា លើកគងនោះនឹងវាយយកមាសប្រាក់ ដាក់ទំលាក់អន្លូងដល់ដោះគងនោះកាលណាមេកាឡកិណីវាស្រែក
ដង្ហោយឡើងថា « អង្គជាតិអើយចូលមកអោយច្រើនទៅ» និមត្ដតែផុតមាត់កាលណារីអង្គជាតិទាំងឡាយ
ក៏កើតឡើងជាប់តាមអវយវៈរាងកាយនៃចៅប្ដីនោះ ចៅប្ដីនោះភិតភ័យមហិមាស្រែកហៅអោយប្រពន្ធជួយ។
អែមេប្រ ពន្ធក៏ភិតភ័យ ទើបថា «ចូរអ្នកអែងវាយគងឡើងបណ្ដេញអោយវាបាត់ទៅវិញ»។ ចៅប្ដីក៏ឧទ្ទិសថា
«អង្គជាតិអើយ
ចូរអន្ដរធានបាត់អោយអស់ទៅវិញទៅ» ថាហើយក៏វាយគងនោះជាគំរប់ពីរដងឡើង
និមិត្ដតែផុតពាក្យផុតសូរគងនោះកាលណា អែអង្គជាតិទាំងនោះ ក៏អន្ដរធានបាត់ទៅវិញ
មិនបាត់តែអង្គជាតិថ្មីនោះឡើយ ទាំងអង្គជាតិចាស់គឺ អង្គជាតិកំណើតខ្លួនក៏បាត់ទៅទាំងអស់
បុរសស្ទាបមើលដឹងថាអង្គជាតិកំណើត គឺពូជចាស់របស់ខ្លួនបាត់ទៅផងដូច្នោះក៏ប្រាប់ទៅប្រពន្ធថា
គេហ៍អើយអីលូវនេះពូជចាស់យើងក៏វាបាត់ទៅជាមួយនឹងពូជថ្មីនោះហើយ» មេប្រពន្ធលឺដូច្នោះក៏ភិតភ័យខ្លាំង
ទើបប្រាប់ប្ដីអោយវាយគងហៅអង្គជាតិកំណើត១ សំរាប់ខ្លួនវិញ។
អែចៅនោះក៏លើកគងឡើងវាយ និយាយថា «គ្រឿងចាស់របស់ខ្ញុំអើយ
ចូរមកកើតដូចដើមវិញ»
និមិត្ដតែផុតពាក្យកាលណា អង្គជាតិចាស់ក៏កើតឡើងប្រាកដដូចដើមវិញហោង។
មេប្រពន្ធឃើញឥទ្ធិរិទ្ធគងមង្គលនោះ ពូកែឆុតឆាប់ដូច្នោះក៏ថា «ចូរអ្នកស្វាមីវាយឡើងម្ដងទៀតទៅ
ខ្ញុំនឹងឧស្ទិសហៅមាសប្រាក់អោយមានដូចគេវិញ»។ ចៅប្ដីថា
«វាយម្ដងទៀតអែណាក៏បានគងនេះវាយបានតែត្រឹមវារៈ
៣ដង អីលូវអែងវាយអស់វារៈ៣ដងទៅហើយ គឺវាយក្នុងកាលបថមនោះ ហងអែងទៅពាំនាំហៅយកអង្គជាតិ
វាយទីពីរនឹងកែមាត់អង្គជាតិក៏បាត់ទៅទាំងចាស់ទាំងថ្មី វាយទីបីហៅបានតែគ្រឿងចាស់ដដែលមកវិញ
នឹងវាយទី៤ទៀតអែណាក៏បាន គ្រូគេហាមផ្ដាច់មកហើយ គិតទៅមេហងអែងជាកាឡកិណី
ស្រ្ដីអលក្ខិណា ធ្វើអោយខូចពិធីអញទៅហើយ ថាហើយចៅនោះក៏យកគងមង្គលនោះទៅជូនម្ចាស់គេវិញហោង។
រឿងនិទាននេះបានគតិដូចបុគ្គលគិតការមិនស្រុះគ្នា ការអែណាមួយតែធ្វើមិនព្រមព្រៀងគ្នា
ហើយការនោះមិនសំរេចទៅបានដូចនិទានមេកាឡកិណីនោះអែង អ្នកមានសតិបញ្ញាគួរពិចារណាទៀតចុះ។
ចប់តំរាកាឡកិណី
និងមង្គលមិនស្រមគ្នាទី១៩
ប្រភព៖ មណ្ឌលវប្បធម៌ខ្មែរនៅស្វីស
No comments:
Post a Comment