៦, កូនមាសឪពុក

កតញ្ញុតាធម៌ ជាគុណធម៌ដែលសំខាន់ក្នុងភាពជាមនុស្ស។
ការដឹងគុណ និងការតបគុណនោះ អាចគ្រប់គ្រងរក្សាឱ្យកូន
ផុតអំពីភាពអាក្រក់ទាំងពួងបាន។

បុគ្គលដែលតបគុណដល់អ្នកដែលមានគុណ រមែងមិននិយាយ
មិនធើ្វ នូវអ្វីដែលជាហេតុឱ្យអ្នកមានគុណក្ដៅក្រហាយចិត្តឡើយ។

កតញ្ញុតាធម៌មានកម្លាំងដ៏ក្រៃលែង បើមិនគិតឱ្យល្អទេ គឺមិន
អាចយល់បានឡើយ ដូច្នេះ កតញ្ញុតាធម៌ត្រូវកូនខំប្រឹងគិត
ឱ្យបានល្អ កុំយល់ថាមិនសូវសំខាន់នោះមនុស្សដែលអាក្រក់
ខុសសីលខុសធម៌ ខុសវិន័យទៅបានតាំងតែពីខុសតូចរហូត
ដល់ខុសធំ គឺកើតមកអំពីការមិនដឹងគុណហ្នឹងឯង តែបើកូន
ជាមនុស្សចេះដឹងគុណ​ កូនមានតែសេចក្ដីចម្រើនដោយ
កុសល ម្យ៉ាងទៀត កតញ្ញុតាធម៌ដែលមានក្នុងខ្លួនកូនជាគ្រឿង
សំគាល់ថា កូនមាសឪពុកជាមនុស្សល្អ។

*កតញ្ញុតាការដឹងគុណ ជាទុនជីវិតពិតដ៏ឆ្នើម
ជួយញ៉ាំងបារមីធំសម្បើម និងជាដង្ហើមនៃកុសល។
កតញ្ញុតាការដឹងគុណ នាំចាកទារុណបាបកង្វល់
គឺជាបញ្ញាគ្រឿងតម្កល់ នាំខ្លួនចូលដល់កុសលកម្ម។
គុណធម៌ល្អណាស់ក្នុងខ្លួនមនុស្ស កូនកុំប្រទូស្ដត្រូវចងចាំ
ជាធម្មតាគុណគ្មានប្រេះស្រាំ ទោះយូរខែឆ្នាំនៅតែល្អ។
បើកូនចង់បានជាមនុស្សពិត ត្រូវមានគំនិតថ្លៃបវរ
កូនកុំយកខ្មៅធើ្វជា ស កុំយកគុណល្អមកជាន់ឈ្លី។

ដកស្រង់ចេញពី៖ សៀវភៅកូនមាសឪពុក